نشر بتاريخ 14-5-2017 في المدونة القديمة

من فترة قريبة كنت نزيل في زنزانة في مبنى أمن دولة ما، ولأن ده مش شئ مفاجئ ولا غير طبيعي خصوصاً إني مقدرش أعد على صوابع إيد واحدة أشخاص أعرفهم مبيتوش ليلة أو ليلتين علي الأقل على البورش من 2011 لحد دلوقتي فخلينا في المهم …

في المواقف اللي زي دي … عينين متغميين وكلابش خلفي وشخص بيلعب كل الألعاب اللي إتعلم إنها ممكن تكسر أي شخص أو ترعبه حد إنه “يقول كل حاجة” بس الأزمة هنا … هي إيه كل حاجة اللي عايز تسمعها يا فندم ..؟؟

في أوقات معينة وبعد ما الخوف بتاع بداية الخطفة ده يقل ويهدى بتبدأ شوية أسئلة وأفكار تفرض نفسها علي دماغي بالعافية ومبعرفش اتخلص منها .. أفكار زي هو فعلاً الشخص الجاهل ضعيف الإمكانيات الذهنية ده فاهم إنه بيعمل شغله كدة .. يعني لما يعدي جنب ودني كل شوية ويهمس بكلمتين تهديد أو يحرك الكرسي بعنف كأنه هيحدفني بيه هل هو كدة فاهم إن ده شغل مش أكتر وبيروح بيته يبقى إنسان طبيعي .. صعب أتخيله مثلاً بيطلب من مراته كباية شاي ولما تتأخر عليه شوية أو تعملها ومتعجبوش بيضرب الإليكتريك في جنبها .. أو لما واحد من عياله ميذاكرش بيحرمه من النوم والأكل والكلام 24 ساعة كاملة مثلاً أو يجيب إتنين مخبرين الاتنين إسمهم حسين يضربوه بغباء وغشومية شديدة لكن منغير ما يسيبوا علامات … “الضربة اللي تهين وتوجع بس متعلمش” صعب أتخيله عايش حياته كلها بالطريقة دي .